مــــعــــزوفة الـــفـــقـــر

يقول الامام علي كرم الله وجهه
(لو كان الفقر رجلا لقتلته)
وانا اقول
(لقد وجدت الفقر رجلا..فعزفته)


صباح الخير
صباح الخير
صباح الورد والكادي مع النوير
صباحٍ فيه للدنيا حكاية طير
فرد في هالمدى ريشه
وروّح يطلب العيشه
بلاهم وبلا تفكير
صباحٍ حسّه العذري يمد الك الفرح واكثر
-------------- صباحٍ فيه للجنه مرايا تعكس النعمه
صباح بضحكة الطفله صباح العيد متأثر
-------------- صباحٍ حالم ايماني وفيه من الرضى طعمه
ضيا هذا الفضا يرسم على وجه التشاؤم نور
يمد ايديه للبسمه ويمنحها امل وسرور
بكل غرور
بكل غرور
بكل غرور يغرينا
----- وومضاته طموح وفرْح
وينساب بأيادينا
----- ويبني في ثراها صرح
يعلمنا وش التغيير
صباح يقسّم انسامه على فمي
صباح الخير ياعمّي
صباحك غير
ولوّح لي (صباح الفقر)
يـ وجه الفقر
فارقني وعني طير
بلا صبح وبلا تغيير
ثمان عقود منظومه على نحر الوجع والضيق
على همي أنام الليل
وفي فقري صباح آفيق
على دينٍ يكب الما على بابي
وانا ظامي ويابس ريق
من طلوع الفجر لاحد المغيب
------- أكدح بساقي على ظهر الرصيف
أزرع آمالي وهَمْ واحصد نصيب
------- واعجنه بالصبر وآسوي رغيف
وتحكيلي صباح الخير
تقنعني
وجاي تقلّي التغيير ينفعني
يـ أبني طير
وحاول تقنع التغيير فيني
أقلك ناظر بعيني
وحاول تقنع التغيير باحفادي
انا من يوم ميلادي
الى هالحين يا أبني
أحس بكل شي حولي
يمد الكف ينهبني
ولابه شي في عمري تغيّر وانقلب لونه
-------------- سوى وجهٍ تجاعيده حكاية عمري الفاني
وذا كفّي وطياته سماره داخل خشونه
-------------- ورعشاته تسلّيني/على المفقود تنعاني
وذولا حفنة اولادي
تغيّر وضعهم لاسوأ... وصاروا رجال
ملوا لي هالبويت عيال
أحد رايح واحد غادي
واحد يستمطر بلادي
واحد يبكي بوسط البير
وجاي تقلي التغيير
يـ أبني طير
فارقني
بلا صبح وبلا تغيير
يـ أبني شوف
فيهم شبه مني كثير
فقير وعاطل وعاجز ولابه روح
طموحي بس في قرصٍ يجي مملوح
لا أكثر
جروحي مؤلمه وتفوح
واتخثّر
وانا مع ضيقة الحيله قدرت احتال
زرعت فراشي ببابي
وصرت لها الفقر تمثال
اقابل مين ولاّ مين
عيالي .. نفسي .. احلامي .. بياض ايدين
نحولة جسمي .. آلامي .. وبيت الطين
يـ أبني طير
فارقني
بلاصبح وبلا تغيير
////
لو أقلّك شي في عمري غريب
------- ماتصدّق لو حلفت الْك اليمين
من بلغت العشر يا أبني الحبيب
-------- منذهل مما حصل في هالسنين
كراسي بس تتغيّر
أسامي بس تتغيّر
يجي واحد بعد واحد ونتفائل معَ قدومه
--------------- نجي للفقر ونسولف ترى بكره بتتغيّر
عصَر منْصِبْه بـ ايدينه ونزّل منّه المقسوم
--------------- وروّح (حسب ما يطلب) ولا سوى ولا غيّر
فقري مثل ماهو .. اذا مازاد
جوعي مثل ماهو .. ولابه زاد
وظعي مثل ماهو .. كما المعتاد
وجاي تقلّي التغيير
يـ أبني طير
فارقني
بلا صبح وبلا تغيير
بعَدْك صغير
ماتدري بها العالم وش اللي يصير
تعيش افراد من عيشة وطن كامل
تموت اوطان باكملها لجل (خبزه)
ولاحد عنّهم سائل
وجاي تقلّي التغيير
يـ أبني طير
فارقني
بلا صبح وبلا تغيير
انا فقري غدى عاده أمارسها وتتبعني
-------------- ثمان سنين خاوتني على الحلوه/على المرّه
صباحك/خلّه يولّي .. ترى ماظن ينفعني
------------- انا مــبـسوط باحوالي واغنّي الفقر وآجرّه
لهيب الحر يكويني/وزود البرد يلسعني
-------------- وشكواي بشراييني ولا ثــارت ولا مرّه
أموت بعزتي جايع وقلبي ما يطاوعني
-------------- لــغير الله يا أبــني أبيــّن ما ســتــر سرّه
وجاي تقلي التغيير
يـ أبني طير
فارقني
بلا صبح وبلا تغيير
////
ياعمي العاده اللي صارت عباده
------- من زود يأسك غديت اليوم تعبدها
عزمك شباب ومراجيح الامل غاده
------- شـفها تدلـّى وتفـرط في تـوددها
اضحك وتقهر معا ضحكاتك الساده
------- انت بعبوسك كذا حقّقت مقصدها
اقلّك طير
فارقني 
بلا صبح وبلا تغيير
أنا ماضي
أنا راضي
وعن حقي بهذا الوقت متغاضي
وخلّوا هالكراسي تدور
أحد آمر واحد مأمور
عزفت الفقر معزوفه عسى اللي فوق يسمعها
--------------- ولو هو من بعد موتي عسى يتحرّك شعوره
يشـوف العالم السـفلي غريـقه فـي مواجعها
--------------- تـنـاظـر داخل الغـبّه بحسـرة نـفـس مقهوره
لعلّـه من على المكتب بتوقـيعـه يـعالـجـهـا
--------------- وينصفهم من الماضي بعد ما فارت الفوره
أما انا يــ ابني
جنون الوقت تعّبني
عسى في وجهي حكايه
لعين الناس تكتبني
أنا راضي
أنا ماضي
أنا مْقاوم لها التغيير
بلا صبح وبلا هم وبلا تغيير
يـ أبني روح فارقني
وعني طير
صباحك ياحبيبي خير

لكم ودي ولهذا الصباح جدي